ویب ڈیسک _ نیوزی لینڈ کرکٹ بورڈ نے پاکستان کے خلاف پانچ ٹی ٹوئنٹی میچز پر مشتمل ہوم سیریز کے لیے 15 رکنی اسکواڈ کا اعلان کر دیا ہے۔
پاکستان اور نیوزی لینڈ کے درمیان ٹی ٹوئنٹی سیریز کا آغاز 16 مارچ سے ہو گا جس میں کیویز ٹیم کی قیادت آل راؤنڈر مچل بریسویل کریں گے۔
بریسویل کی بطور کپتان یہ دوسری سیریز ہو گی۔ اس سے قبل اپریل 2024 میں دورۂ پاکستان کے دوران انہوں نے ٹیم کی قیادت کی تھی۔
حال ہی میں چیمپئنز ٹرافی کھیلنے والی کیویز ٹیم کے کئی اہم کھلاڑی پاکستان کے خلاف اعلان کردہ ٹی ٹوئنٹی اسکواڈ میں شامل نہیں ہیں۔
کیویز کرکٹ بورڈ نے ایک بیان میں کہا ہے کہ انڈین پریمیئر لیگ (آئی پی ایل) کی مصروفیات کی وجہ سے ون ڈے ٹیم کے کپتان مچل سینٹنر، اوپننگ بلے باز رچن روندرا، ڈیوڈ کونوے، گلین فلپس اور لوکی فرگوسن ٹی ٹوئنٹی سیریز نہیں کھیل سکیں گے۔
نیوزی لینڈ کے سابق کپتان کین ولیمسن بھی پاکستان کے خلاف ٹی ٹوئنٹی اسکواڈ میں شامل نہیں ہے۔ ولیمسن کی عدم دستیابی سے متعلق کیویز بورڈ کا کہنا ہے کہ وہ آئندہ ماہ پاکستان سپر لیگ (پی ایس ایل) کھیلیں گے جس کی وجہ سے انہیں ٹیم میں شامل نہیں کیا گیا۔
